“Azərbaycan Respublikası gömrük orqanlarının vəzifəli şəxslərinin xüsusi geyim forması və fərqlənmə nişanları haqqında Əsasnamə”sində dəyişiklik edilib.
7times.az xəbər verir ki, Prezident İlham Əliyev bununla bağlı fərman imzalayıb.
Fərmanla gömrük orqanlarının vəzifəli şəxslərinin xüsusi geyim forması müəyyənləşib.
Gömrük orqanlarının vəzifəli şəxslərinin xüsusi geyim forması onların geyim əşyaları və fərqlənmə nişanlarının dəstidir.
İndiyədək fərqlənmə nişanlarına poqon, ulduzlar, qol və yaxa nişanları, kokarda, forma düymələri, qalstuk üçün sıxac, kant və lampas aid idi. Dəyişiklikdən sonra bu sıraya döş nişanı da əlavə edilib.
Məlumat üçün bildirək ki, fərqlənmə nişanları – geyim formasında rəmzlər şərti təsvir olunmaqla dövlət mənsubiyyətini, Dövlət Gömrük Komitəsinə və xüsusi rütbəyə mənsubiyyəti göstərir.
Həmçinin fərmanda qeyd olunub ki, gömrük orqanının vəzifəli şəxsinin xidmət etdiyi gömrük orqanını (qurumunu) müəyyənləşdirməyə imkan verən fərqlənmə döş nişanı bu Əsasnamənin 1.9-cu bəndində nəzərdə tutulmuş qaydalara uyğun olaraq daşınır.
Döş nişanı metal lövhədən hazırlanır. Uzunluğu 6 santimetr, eni 5 santimetr olmaqla, aşağı hissəsi ovalşəkillidir. Kənarları qızılı rəngli xətlə haşiyələnib. Yuxarı hissə tünd göy rəngdədir və həmin hissədə qızılı rəngli fon üzərində ağ rənglə Azərbaycan Respublikası gömrük orqanının vəzifəli şəxsinin şəxsi qeydiyyat nömrəsi, sağ və sol kənarlarında isə qızılı rəngli sünbül təsviri həkk olunub. Döş nişanının orta sağ və sol kənarları tünd qırmızı rəngdədir, hər iki kənarda qızılı rəngli səkkizguşəli ulduz təsviri həkk olunub. Döş nişanının ovalşəkilli aşağı hissəsi tünd yaşıl rəngdədir və üzərində qızılı rəngli hərflərlə “Dövlət Gömrük Komitəsi” sözləri yazılıb. Orta (mərkəzi) hissədə Azərbaycan Respublikası gömrük orqanlarının bayrağının və Azərbaycan Respublikası gömrük orqanlarının embleminin təsviri həkk olunub. Nişanın yuxarı, orta və aşağı hissələrini bir-birindən qızılı rəngli haşiyələr ayırır. Metal lövhə qara rəngli süni dəridən hazırlanmış altlığa bərkidilib. Nişanın bərkidildiyi qara rəngli süni dəri altlığın yuxarı hissəsinin ortasında geyim formasına bərkidilmək üçün nəzərdə tutulan düymə dəliyi var.
