Azərbaycanda üç gənclik zümrəsi yetişib. Biri 44 günlük müharibədə torpaqlarımızı işğaldan azad edən gənclikdir. Digəri dünyanın ən nüfuzlu universitetlərinə öz zəkası, biliyi ilə daxil olan, təhsil alan gənclərdi.

Üçüncü zümrə isə bu gün paytaxtda yerləşən alış-veriş mərkəzlərinin birində Rusiyada yaşayan tanınmış azərbaycanlı blogerlə görüşmək üçün izdiham, basırıq yaradan, özlərinin təhqir olunmasına izn verən gənclərdi.

Bu üçüncülərin sayı yüzlərlə, minlərlədir. Belə ki, minlərlə insan sıradan bir blogeri görmək üçün ticarət mərkəzinə axın edib.

Nədən? Niyə?

İddialara görə, belə bir izdihamın yaşanmasına səbəb həmin blogerin öz izləyicilərinə “Iphone” bağışlayacağını vəd etməsi olub.

Bax belə.

Bir “Ayfon”a görə üçüncü kateqoriyadan olan gənclərimiz bu gün paytaxtımızın göbəyində sözün əsl mənasında mərəkə qoparıblar.

Əslində bu izdiham və orada yaşananlar sadəcə xəbər mövzusu deyil, bu bir faciədir, müsibətdir. Gəncliyimizin üçüncü qanadının müsibətidir.

Onlar kapitalizmin məhsulu olan bahalı bir telefon markasının əsirinə, köləsinə çevriliblər. Və nə yazıq ki, onlar özləri bunun fərqində deyil.

“KÜT-lə psixologiyası”na yenilən, tabe olan fərdlər adətən belə məqamlarda nə etdiklərinin fərqində olmurlar. Onlar sürü kimi hərəkət edirlər.

Maraqlıdır, görəsən, ölkədə üçüncü zümrəyə daxil olan gənclərimizin sayı toplam nə qədər olar?

P.S.

Allah birinci və ikinci zümrədən olan vətənpərvər, zəki gənclərimizə bərəkət versin.