“Formula-1” üzrə Azərbaycan Qran-prisinin rəsmi hissəsinin ssenarisi bəlli olub.

7times.az–ın məlumatına görə, yarışın himn mərasimində Azərbaycanda beşinci dəfə təşkil olunan mərhələnin konsepsiyası vurğulanacaq və multikulturalizmlə tolerantlıq ideyası əsas götürüləcək.

Dövlət Himnimiz Vətən Müharibəsi qazisi Atəş Qarayev və Səbinə Babayeva tərəfindən səsləndiriləcək. Bu zaman Azərbaycan Dövlət Bayrağını tutan müxtəlif millətlərin nümayəndələri trek üzərində dayanacaq. Onlar Bakıda keçirilən beşinci “Formula-1” yarışını simvolizə edən və barış işarəsini əks etdirən “V” şəklində dayanacaqlar.

Bu mərasim üçün yaradılan Himnin xüsusi versiyası tanınmış Azərbaycan bəstəkarı və musiqi prodüseri Azad Vəliyev tərəfindən hazırlanıb.