Vaşinqton Federal Məhkəməsi ABŞ Prezidenti Donald Tramp administrasiyasının qanuni immiqrasiya ilə bağlı tətbiq etdiyi sərt məhdudiyyətləri bloklayıb. Sözügedən məhdudiyyətlər 2025-ci ilin noyabrında Milli Qvardiya hərbçilərinə qarşı törədilən silahlı hücumdan sonra qüvvəyə minmişdi.

“7Times.az” xəbər verir ki, Kolumbiya dairəsinin dairə hakimi Con Makkonnel iyunun 5-də verdiyi qərarda Afrika, Asiya, Latın Amerikası və Yaxın Şərqin 39 ölkəsinin vətəndaşları üçün sığınacaq alınması, iş icazələri və “Green Card” (yaşıl kart) qaydalarının sərtləşdirilməsini qanunsuz hesab edib.

Hakim Makkonnel öz qərarında qeyd edib ki, Ağ Evin həyata keçirdiyi bu məhdudlaşdırıcı immiqrasiya siyasəti hazırda Birləşmiş Ştatlarda yaşayan saysız-hesabsız immiqrantın həyatını qeyri-müəyyən hüquqi vəziyyətə salıb.

Məhkəmənin gəldiyi qənaətə görə, ABŞ Vətəndaşlıq və İmmiqrasiya Xidməti (USCIS) ölkədəki anti-immiqrant əhvali-ruhiyyəsini və qərəzli yanaşmaları gizlətmək məqsədilə milli təhlükəsizlik amilindən uydurma bəhanə kimi istifadə edib. Hakim Makkonnel vurğulayıb ki, tətbiq edilən bu radikal tədbirlər səbəbindən minlərlə insan sırf doğulduqları məkana (ölkəyə) görə artıq yarım ildir ki, hüquqi statusdan və iş yerlərindən məhrum vəziyyətdə qalıb.

Xatırladaq ki, Tramp administrasiyasının bu qərarının ləğv edilməsi tələbi ilə məhkəmə iddiası cari ilin mart ayında miqrantlara yardım göstərən hüquq-müdafiə təşkilatlarının koalisiyası tərəfindən qaldırılmışdı.

ABŞ Vətəndaşlıq və İmmiqrasiya Xidməti (USCIS) 2025-ci ilin dekabr ayının əvvəlində – Vaşinqtonda, Ağ Evin cəmi bir neçə məhəlləliyində ABŞ Milli Qvardiyasının döyüşçülərinə atəş açılmasından dərhal sonra ilk mərhələdə 19 ölkə vətəndaşının immiqrasiya sorğularına baxılmasını dayandırmışdı. Sonradan bu siyahı genişləndirilərək 39 ölkəyə çatdırılmışdı.

Sözügedən qanlı hücumda ABŞ Mərkəzi Kəşfiyyat İdarəsi (MKİ / CIA) ilə müqavilə əsasında hərbi hazırlıq keçmiş Əfqanıstan vətəndaşı Rəhmanulla Lakanvala ittiham olunur. Müstəntiqlərin rəyinə görə, Lakanvala MKİ tərəfindən dəstəklənən xüsusi bölmənin tərkibində yer alıb. O, 2021-ci ildə ABŞ qoşunlarının Əfqanıstandan çıxarılmasından sonra “Taliban”ın repressiyalarından qorxan on minlərlə digər əfqanla birlikdə Birləşmiş Ştatlara köçüb.

Hazırda barəsində həbs qətimkan tədbiri seçilən və məhkəmə prosesini gözləyən Rəhmanulla Lakanvala öz təqsirini boynuna almır.

Ekspertlər federal məhkəmənin bu son qərarını Tramp administrasiyasının daxili və miqrasiya siyasətinə gərgin seçki ili ərəfəsində vurulmuş ciddi hüquqi zərbə kimi qiymətləndirirlər.

AzPolitika

Follow @7timesaz