“44 günlük Vətən müharibəsinin nəticəsi olaraq artıq regionda yeni geo-siyasi reallıq yaranıb. Türkiyə regionda və dünyada Azərbaycan üçün təminatçı ölkəyə çevrilib”.

Bu fikirləri KONKRET.az-a açıqlamasında politoloq Samir Hümbətov səsləndirib. O bildirib ki, son beş ildə baş verən proseslər mahiyyət etibarı ilə regionda yeni geo-siyasi və geo-strateji reallığın yaranmasına səbəb olub: “Eyni zamanda regionda güc balansı dəyişib. 200 ilə qədər regionda dominant mövqedə olan rus siyasəti bu hərbi əməliyyatlardan sonra türk siyasəti ilə mövqelərini bölüşməli olub. Azərbaycan ordusu dünya orduları sırasında öz mövqelərini möhkəmləndirməklə 64-cü pilləyə yüksəlib”.

Politoloq bundan sonra vəziyyətin təxminən necə olacağı ilə bağlı  ehtimallarını sadalayıb:

1) Azərbaycan zaman içində rus “sülhməramlıları”nın nəzarət etdiyi ərazilərdə öz suverenliyini tam şəkildə bərpa edə bilər. Laçın dəhlizi Azərbaycanın öz nəzarətinə keçəcək.

2) Zəngəzur dəhlizinin açılması reallaşacaq.

3) Türkiyə hərbi bazaları Azərbaycanın müxtəlif bölgələrində, xüsusilə də işğaldan azad edilmiş bölgələrində qurula bilər.

4) Vəziyyət Azərbaycanın istədiyi kimi davam edərsə, 5 il sonra rus “sülhməramlıları” bölgəni tərk edə bilər.

5) Ermənistan Azərbaycana və Türkiyəyə qarşı iddialarından əl çəkərsə, tərəflər arasında sülh müqaviləsi imzalana bilər.

Görünən odur ki, sözügedən proseslər üçün həm zaman, həm də mümkün siyasi şərait lazımdır. Vaxt isə çoxdan yetişib”.

KONKRET.az

Follow @7timesaz