“Hesab edirəm bütövlükdə Azərbaycan Parlamentinin fəaliyyətini şübhə altına almaq, eləcə də seçkilərin qeyri demokratik keçirildiyini söyləmək düzgün yanaşma deyil. Parlament Azərbaycan xalqını təmsil edən qanunverici orqandır və onun kifayət qədər səmərəli fəaliyyəti var. Bu da danılmaz faktdır ki, Milli Məclis bu gün parlament diplomatiyasını uğurla həyata keçirir”.

Bu fikirləri 7Times.az-a açıqlamasında Milli Məclisin deputatı Ceyhun Məmmədov həmkarı Erkin Qədirlinin parlament seçkilərinin qeyri-demokratik şəraitdə keçirilməsi iddiasına münasibət bildirərkən səsləndirib. O bildirib ki, bu gün parlament Azərbaycan xalqının iradəsini ifadə edir və fəaliyyətini normal şəkildə davam etdirir:

“Parlamentdə deputatlar xalqı təmsil edir və üzərlərinə düşən missiyanı layiqincə yerinə yetirirlər. Bu gün Parlament xalqımızın inkişafı, dövlətimizin güclənməsi, müstəqilliyinin möhkəmlənməsi üçün mühüm addımlar atır. Eyni zamanda hesab edirəm ki, hər kəs açıqlama və bəyanat verərkən diqqətli olmalı, yanlış açıqlamalardan uzaq olmalıdır. Əlbətdə hər kəs öz şəxsi fikrini bildirməkdə azaddır. Ancaq bu o demək deyil ki, bütövlükdə parlamentin fəaliyyəti şübhə altına alınmalıdır. Əgər kimsə özünün demokratik yolla seçilmədiyini düşünürsə mandatından imtina edə bilər”.

7Times.az

 

Follow @7timesaz