Gəncə Ağır Cinayətlər Məhkəməsində dələduzluqda ittiham olunan lombard sahibi, “Gold Kredit 10” MMC-nin rəhbəri, iş adamı Kazım Məmmədovun cinayət işi üzrə məhkəmə prosesi başa çatıb.

7Times.az xəbər verir ki,  araşdırmalar nəticəsində məlum olub ki, lombarddan şikayətçi olan 39 nəfər var və onların ümumilikdə bazar qiyməti 76 min manatdan çox olan 1,5 kiloqram qızıl-zinyət əşyalarının mənimsənilib.

Təqsirləndirilən Kazım Məmmədov ifadəsində bildirib ki, vəziyyətin bu yerə çatmasında şirkətin keçmiş mühasibi Nahidənin günahkar olub. O, mühasibin lombarda qoyulmuş qızıllara görə toplanan 200 min manata yaxın pulları ələ keçirdiyini, lakin əməlləri üzə çıxdıqdan sonra intihar etdiyini deyib:

“2013-cü ildə şirkət təsis edərək fəaliyyətə başladıq, maliyyə vəsaitim olmadığı üçün tanışım mənə müxtəlif vaxtlarda və məbləğlərdə pul verirdi. Həmin vaxt Nahidə adlı mühasibimız vardı. O, məndən xəbərsiz girov qoyulmuş qızılların müqabilində götürülən kreditlərin ödənişlərini mənimsəyib. Faktın üstü 2015-ci ilin yayında açıldı, Nahidənin 200 min manat pulu mənimsəməsi məlum oldu. Məbləği ödəyə bilmədiyi üçün mən ödəməli oldum. Nahidənin əməlinin üstü açılandan sonra pul götürdüyüm adamla razılaşdım ki, müştərilərin bir qismi pulu həmin şəxsə ödəsin. Təxminən 400 min manat məbləğində kredit ödənişi müştərilər tərəfindən birbaşa pul götürdüyüm tanışıma ödənildi. 2015-2016-cı ildə isə 400 min manat dəyərində qızılları Azərbaycan Beynəlxalq Bankına girov qoyaraq, o məbləğdə kredit götürüb həmin şəxsə olan borcumu ödəyib bitirdim. Bundan sonra isə müştərilərin kredit ödənişləri ilə banka olan borcumu ödəməyə başladım. Nahidə isə həmin pulu qaytara bilmədiyi üçün 2016-ci ilin martında intihar etdi. Nahidə vergi və DSMF ödənişlərini də etmədiyindən maddi sıxıntılarım daha da artdı, bu səbəbdən də Nahidə intihar edəndən sonra şirkətin fəaliyyətini dayandırıb yeni MMC kimi fəaliyyətə başladım”.

Kazım Məmmədovun sözlərinə görə, yeni şirkəti bankdan çəkdiyi kredit hesabına fəaliyyət göstərib. Lakin daha sonra müştərilər azaldığı, eləcə də kreditləri vaxtında ödəyə bilmədiyi üçün vəziyyəti pisləşib. O, Beynəlxalq Bankda lombard kreditləşməsi dayandıqdan sonra qızılları başqa kredit şirkətinin balansına keçirib pul götürdüyünü və həmin pullarla qızıl sahiblərinin böyük hissəsinə olan borcunu ödədiyini bildirib.

İstintaq müddətində şikayətçi olan şəxslərin bir neçəsi də qızılları qaytarıldığı üçün şikayətlərini geri götürüb.

K.Məmmədov daha sonra ödənişləri edə bilmədiyini, imkanı daxilində yerdə qalan şəxslərə də ödəniş etmək niyyətində olduğunu deyib.

Məhkəmənin hökmünə əsasən, Kazım Məmmədov 5 il azadlıqdan məhrum edilib. O, məhkəmə zalında həbs edilərək cəzaçəkmə müəssisəsinə göndərilib.

Qeyd edək ki, K.Məmmədovun sahibi olduğu şirkətin mühasibi Nahidə Məmmədova 8 mart 2016 tarixində 45 yaşlında Gəncədəki qəbiristanlıqların birində intihar edib. O, anasının qəbri üstündə özünü zəhərləyərək həyatına son qoyub. Mərhumun 4 uşağı qalıb.

Nəzrin Cavadzadə

Follow @7timesaz