Rusiyanın neft və qaz ixracında problemlər aprel müqavilələrindən başlanıb.
Sfera.az Rusiya mediasına istinadən xəbər verir ki, bu haqda açıqlamanı baş nazirin müavini Aleksandr Novak Dövlət Dumasında Kommunist Partiyası fraksiyası ilə görüşündə deyib. Novak bildirib ki, Rusiya hökuməti aprel ayında neft və neft məhsullarının ixracı üçün müqavilələrin bağlanması ilə bağlı problemlər gözləyir.
“Hazırda həm qaz, həm də neft hasilatı tam həcmdə həyata keçirilir. Qaz kəmərləri ilə ixracda da problem yoxdur, mayeləşdirilmiş təbii qazın (LNG) ixracı da davam edir. Mart ayı üçün müqavilələr bağlanıb və məhsullar təhvil verilir. neft və neft məhsullarının tədarükü ilə bağlı aprel ayında problemlər gözləyirik. Amma biz artıq müəyyən problemlərlə üzləşirik. Problemlər ilk növbədə maliyyələşmə ilə bağlıdır”, – deyə o bildirib.
Novak bank sektoruna qoyulan sanksiyaların çətinlik yaratdığını etiraf edib:
Follow @7timesaz
“Bank sektorunda və maliyyələşdirmədə məhdudiyyətlərin tətbiq edilməsi ilə əlaqədar, bir çox təchizatçı, alıcı və treyder banklardan akkreditivlərin alınmasında problemlərlə üzləşirlər. Bu çətinliklərin həlli üçün Energetika Nazirliyimiz Rusiya şirkətləri və xarici podratçılarla işləyir. Biz başqa yollar tapırıq, məsələn, Çin şirkətləri ilə əlaqələr qururuq. Amma bu, davamlı üsul deyil, bunlar təcrid olunmuş hallardır. Müxtəlif ödəniş üsulları var və biz akkreditivsiz işləyirik”.
Novak tədarük çətinliyinin də olduğunu söyləyib: “Gəmilərdən istifadə ilə bağlı çətinlik var. Sığortaçılar mal daşınmasını sığortalamır, bu da əlavə problem yaradır”.