Müdafiə Nazirliyinin ehtiyaclarına görə Rusiyanın regionlarında 4G interneti söndürülür.

Bu barədə “Kommersant” qəzeti telekommunikasiya operatorlarındakı mənbələrə istinadən yazıb.

Bundan əvvəl Pskov, Novqorod və Leninqrad vilayətlərinin hakimiyyət orqanları yanvarın 25-dən 30-dək regionlarda gecə saatlarında 4G mobil internetinin (LTE) işləməyəcəyini açıqlamışdı. “Kommersant” yazır ki, eyni şey digər bölgələrdə də baş verir, çünki iş “federal səviyyədə planlaşdırılır”, lakin sürət texniki aspektlərə görə dəyişə bilər. Rəsmi versiyaya görə, fasilələr radiotezlik spektrinin qurulması üzrə texniki işlərlə bağlıdır. “Kommersant”ın Rusiyanın üç böyük telekommunikasiya operatorundaki həmsöhbətləri deyirlər ki, internet hakimiyyət orqanlarının tələbi ilə məhdudlaşdırılıb və onların avadanlığı düzgün işləyir və bağlanma tələb etmir.

Onlardan biri deyib ki, hüquq-mühafizə orqanlarının pilotsuz uçuş aparatları və hava hücumundan müdafiə üçün avadanlıqlarını tənzimləmək üçün yüksəksürətli internet söndürülməli idi. Buna Rusiya Prezidentinin Şimal-qərb bölgələrinə, yanvarın 26-28-də isə Sankt-Peterburqa səfəri ilə əlaqədar artan təhlükəsizlik səbəb ola bilər.

RBC nəşri isə öz mənbələrinə istinadən həmçinin yazır ki, gecə fasilələri yüksək rütbəli məmurların səfəri ilə bağlıdır. Onlar Putin və Belarus lideri Aleksandr Lukaşenkonun səfərini nəzərdə tutur.

“Kommersant”ın həmsöhbətləri abunəçilərin internetdə fasilələrdən şikayətləndiyini bildirir, ekspertlər isə başqa problemlərin olduğunu qeyd edirlər. Məsələn, kəsintilər korporativ şəbəkələri, videomüşahidə sistemlərini, bankomatları və işləmək üçün genişzolaqlı bağlantı tələb edən digər cihazları və proqramları poza bilər.

Pilotsuz uçan aparatların hazırlanması şirkəti “Kommersant”a bildirib ki, antidron sistemləri operator avadanlığı ilə eyni diapazonda işləyə bilər. “Ancaq onlar fərq qoymadan işləsələr, mobil məlumatların ötürülməsinə müdaxilə başlayacaq”, – həmsöhbət aydınlaşdırıb.

Rusiyanın Ukraynaya genişmiqyaslı işğalı başlayandan bəri döyüş pilotsuz təyyarələri mütəmadi olaraq Rusiyanın bölgələrinə uçuşlar həyata keçirərək dağıntı və tələfata səbəb olur. Rusiya Müdafiə Nazirliyi hücumların Ukrayna tərəfdən həyata keçirildiyini iddia edir. Əksər hallarda Kiyev bu mesajları şərh etmir.

Yanvarda belə dronlardan biri Leninqrad vilayətində, Ust-Luqa limanında obyekti vurub. Daha sonra Sankt-Peterburq limanında neft terminalına hücum cəhdi baş verib. Nəticədə terminalda LNG qazını tankerlərə yükləmə avadanlıqları sıradan çıxıb.

“AzPolitika.info”

Follow @7timesaz