Çeçenistan rəhbəri Ramzan Kadırov Ukraynanın Donbass bölgəsində özünü elan etmiş separatçı Donetsk və Luqansk Xalq respublikalarına dəstək verib.

Modern.az Rusiya KİV-nə istinadən xəbər verir ki, R.Kadırov Dövlət Dumasının separatçı respublikaları  tanımaq çağırışını dəstəkləyib.

“Mən Dövlət Dumasının Donetsk və Luqansk Xalq respublikalarının müstəqilliyinin tanınmasının zəruriliyi ilə bağlı Rusiya Federasiyasının prezidentinə müraciət etmək qərarını tam dəstəkləyirəm”, – Ramzan Kadırov teleqram kanalında yazıb.

Onun fikrincə, Rusiya prezidenti Vladimir Putin bunu mütləq edəcək, çünki bu, sülh üçün mühüm addımdır.

“Rusiya tərəfindən özünü elan etmiş Donetsk və Luqansk Xalq Respublikalarının tanınması sülh yolunda mühüm addım olacaq”, – Kadırov deyib.

Çeçenistan Respublikasının başçısı vurğulayıb ki, məhz Donetsk və Luqansk Xalq Respublikalarının müstəqilliyinin tanınması “onların dünya səhnəsindəki statusunu müəyyən edəcək və uzun illər davam edən qarşıdurma və qan tökülməsinə son qoyacaq”.

O qeyd edib ki, çeçen xalqı özbaşınalığın, zorakılığın və davamlı düşmənçiliyin nəyə gətirib çıxardığını yaxşı xatırlayır.

Kadırov həmçinin xarici medianı hər gün Rusiyanın Ukraynaya yeni “işğal tarixi” ilə bağlı dezinformasiya dərc etməkdə ittiham edib.